>لوكنت رجال اقرا القصه دى<

السلام عليكم ورحمة الله وبركاته




"يا أحمد حرام عليك أنا واقفه في الشارع لوحدي "


انطلقت صرخة هبه عالية عبر هاتفها المحمول معاتبة زميلها
علي تأخره نصف ساعه كاملة عن ميعاده

فقال في محاولة لتبرير موقفه وتغيير دفة الحديث

" وأنا اعملك اية ؟ ما قولتلك الطريق زحمة ، وكمان
انتي نسيتي نفسك ولا إيه ؟؟ انتي بتزعقيلي انا كده ؟ "

لكن هبة فاض بها الكيل من معاكسات الشباب التي وصلت في
بعض الأحيان إلي التلميحات الجنسيه

فقالت في محاولة يائسة لتحفيزه : ما انت لو راجل ما
تسيبش بنت لوحدها في الشارع نص ساعه .

أحمد وقد بلغ غضبه منتهاه : " أنا مش راجل ؟؟ طب
ورحمة أمي ما أنا جاي "

وأغلق المحادثه والهاتف كله بعنف وعروقه تنتفض غضباً من
وصف هبه بإنه " مش راجل " .

ملحوظه : " الراجل اللي بجد ما يمشيش مع بنت من ورا
أهلها ويدخل معاها سينما ويقعد يفعص فيها "



************



تسير هبة عائدة لمنزلها وهي في قمة ثورتها وتتوقف عند
مركز إتصالات لشراء كارت شحن جديد

علي بعد عشرة أمتار يجلس مجموعه من الشباب يتعاطون
المخدرات .

" بس الواد حسام اسبايدر ده طلع قلة يا عم ومالوش
في أي حاجه "

نطقها ابراهيم
بمنتهي الحنق وهو يناول مصطفي سيجارة المخدر .

فقال مصطفي مدافعاً عن سبايدر : " ليه يا عم ؟ ، ده
عيل رجولة ولسه مصبحني امبارح وعامل معايا أحلي واجب "

إبراهيم مستنكراً : " راجل ؟؟ ده أفور من أول جوينت
إمبارح وسقط مننا وكمان جابلنا حاجه لايحة معاه وهو جاي ، مش عشان صبحك انت تفوق
علينا ، ولا انت بتاع مصلحتك بقي ؟ "

تدخل أمجد محاولا تغيير دفة الحديث وهو يشير إلى هبة :
" ولا بص المكنة اللي هناك دي "

يلتفت الثلاثه بنظرهم إلى هبة التي أخذت كارت الشحن
وذاهبة إلى بيتها وعيونهم تكاد تخترق ملابسها الضيقة إلي مفاتن جسدها .

وقال إبراهيم ذاهلاً :

" بس دي مكنة عالية عليك يا عم أمجد ، دي مجنطة
وفتحة سقف ، مش إحنا اللي نركبها "

أمجد : " إتكلم عن نفسك يا أمور ، 10 دقايق وأجيبها
في الجراج "

ملحوظة : " الراجل اللي بجد ما يسلمش نفسه بإيده
للكيف ، والراجل اللي بجد ما يضرش صاحبه ويدمرله صحته بإيده "

************





يذهب أمجد ليعترض طريق هبة التي لا تبالي بوجوده ، فيمسك
هاتفه المحمول الغالي جداً وتنطلق منه أغنية نجم الجرير " هي دي " وأمجد
يمثل دور تامر في الطريق العام وينظر إلي عوراتها بدون أي حياء.

لم تجد هبة من يعترض له من " رجال " الشارع بل
وجدت من يشجع ويهلل فقالت في محاولة يائسة منها للدفاع عن نفسها :

" يا كابتن
لو سمحت سيبني أعدي ، مفيش راجل بيعمل اللي إنت بتعمله ده "

يضحك أمجد إبتسامة وقحة قائلاً : " ما أنا راجل ،
أمال اللي في وشي ده وساخة ولا ايه ؟ { يقصد شنبه } ولا إنتي تقصدي حاجه تانية
أثبتلك بيها إني راجل ؟ "

قالت هبة في تورة بلغت منتهاها :

" طب والله العظيم يا حيوان هاوريك أنا هعمل إيه ،
لو انت راجل خليك مكانك هنا 10 دقايق "



ملحوظة : يا أمجد لو الرجولة بالشنب : الصرصار كده يبقي
أرجل منك ، ولو الرجولة بالحاجات التانية اللي تقصدها ، يبقي الحمار أرجل منك ،
وكمان يا ست هبة زي ما الرجولة أدب مش هز كتاف ، الأنوثه أدب برضه مش هز
..................... مشيها كتاف المرة دي













تقتحم هبة منزلها وهي تبكي في هستريا ، ليستقبلها معتز
أخوها قائلاً :

" اية بس يا هبة فيه ايه ؟ "

تحاول هبة شرح الموقف وسط دموعها :

" فيه عيال ضايقتني يا معتز وقالولي كلام وحش أوي
"

معتز ثائراً :

" فين ولا التييت دول وأنا أطلعلك تيت أبوهم "


معتز يعمل فيها إبراهيم الأبيض وياخد مطوته وينزل
ينخانق مع العيال .



ملحوظة : الرجولة يا معتز إنك تحافظ علي أختك وتخليها
تلبس حاجه محترمة قدام الناس ، والرجولة برضه انك تهتم بأختك وتحاول تبقي انت وهي
صحاب وما تخليهاش تروح تشوف بديل غيرك برة

ولو عايز تعرف معني الرجولة اقري كلام ربنا :



{لاَ تَقُمْ فِيهِ أَبَداً لَّمَسْجِدٌ أُسِّسَ عَلَى
التَّقْوَى مِنْ أَوَّلِ يَوْمٍ أَحَقُّ أَن تَقُومَ فِيهِ فِيهِ رِجَالٌ
يُحِبُّونَ أَن يَتَطَهَّرُواْ وَاللّهُ يُحِبُّ الْمُطَّهِّرِينَ }التوبة 108



{رِجَالٌ لَّا تُلْهِيهِمْ تِجَارَةٌ وَلَا بَيْعٌ عَن
ذِكْرِ اللَّهِ وَإِقَامِ الصَّلَاةِ وَإِيتَاء الزَّكَاةِ يَخَافُونَ يَوْماً
تَتَقَلَّبُ فِيهِ الْقُلُوبُ وَالْأَبْصَارُ }النور37





{مِنَ الْمُؤْمِنِينَ رِجَالٌ صَدَقُوا مَا عَاهَدُوا
اللَّهَ عَلَيْهِ فَمِنْهُم مَّن قَضَى نَحْبَهُ وَمِنْهُم مَّن يَنتَظِرُ وَمَا
بَدَّلُوا تَبْدِيلاً }الأحزاب23





هؤلأء هم الرجال

يا رجال المسلمين

صحيح والله الرجوله في اشياء مفيده واشياء تستدعي لرجوله مش الرجوله في اشياء بالحرام

شكرا لكي يا حبوبه على هذه الروايه الجميله والمفيده

عذرا اقصد اخويا